- १२ हजार ५०० रुपये मिळणार दिवाळी अग्रीम
- शिंदेंची शिष्टाई यशस्वी, संप टळला
मुंबई : प्रतिनिधी
महाराष्ट्र राज्य परिवहन महामंडळ तथा एसटीच्या सुमारे ८५ हजार कर्मचारी आणि अधिका-यांना दिवाळी भेट म्हणून ६ हजार रुपये सानुग्रह अनुदान देण्याचा निर्णय उपमुख्यमंत्री एकनाथ शिंदे यांनी सोमवार दि. १३ ऑक्टोबर रोजी जाहीर केला. तसेच कर्मचा-यांच्या वेतन वाढीचा फरक देण्यासाठी महामंडळाला सरकारकडून ६५ कोटी रुपये देण्याचे आणि पात्र कर्मचा-यांना दिवाळी अग्रीम म्हणून १२ हजार ५०० रुपये देण्यात येणार असल्याचेही शिंदे यांनी घोषित केले. त्यामुळे एसटी कर्मचा-यांनी दिवाळीच्या तोंडावर आंदोलन करण्याचा निर्णय मागे घेतल्याचे सू्त्रांकडून समजते.
उपमुख्यमंत्री एकनाथ शिंदे यांच्या उपस्थितीत आज सह्याद्री अतिथीगृह येथे एसटीच्या सर्व कर्मचारी संघटनांची आणि कृती समितीची बैठक पार पडली. यावेळी शिंदे म्हणाले, राज्यात अतिवृष्टीमुळे बिकट परिस्थिती निर्माण झाली आहे. तरीही एसटी कर्मचा-यांची दिवाळी गोड झाली पाहिजे, म्हणून सरकारने आज हा निर्णय घेतला आहे. त्याचबरोबर एसटीला आर्थिकदृष्टया समृद्ध करणे गरजेचे आहे. एसटी महामंडळाचे उत्पन्न वाढण्यासाठी विविध उपाययोजना करण्यात येत आहेत. त्यासाठी खासगी शासकीय सहभागी तत्वावर एसटीच्या जागांचा विकास करण्यात येणार आहे.
एसटीचे सर्व कर्मचारी आणि अधिका-यांना दिवाळी भेट म्हणून ६ हजार रुपये देण्यासाठी सरकारने सुमारे ५१ कोटी रुपये अनुदान देण्याचे मान्य केले. याशिवाय जे पात्र कर्मचारी सण अग्रीम घेण्यास इच्छुक आहेत, त्यांना पूर्वीप्रमाणे १२ हजार ५०० रुपये देण्यात येणार आहेत. त्यासाठी शासनाकडे ५४ कोटी रुपयांची मागणी एसटी महामंडळाने केल्याची माहिती परिवहन मंत्री प्रताप सरनाईक यांनी दिली.
