नवी दिल्ली : नरेंद्र मोदींनी सलग तिस-यांदा पंतप्रधानपदाची शपथ घेतल्यानंतर अजित डोवाल यांचीही सलग तिस-यांदा राष्ट्रीय सुरक्षा सल्लागारपदी नियुक्ती करण्यात आली तर पी. के. मिश्राही पंतप्रधान नरेंद्र मोदींच्या प्रधान सचिवपदी कायम राहिले आहेत. अजित डोवाल यांना कॅबिनेट मंत्रिपदाचा दर्जा देण्यात आला आहे. पी. के. मिश्रा यांनाही कॅबिनेट मंत्रिपदाचाच दर्जा दिला जाणार आहे. यासोबत अमित खरे आणि तरुण कपूर हेही पंतप्रधान मोदींचे सल्लागार म्हणून कायम राहणार आहेत.
डॉ. पी. के. मिश्रा आणि अजित डोवाल हे दोघेही पंतप्रधानांचे सर्वाधिक काळ प्रमुख सल्लागार राहिले आहेत. अजित डोवाल हे १९६८ च्या बॅचचे आयपीएस अधिकारी असून ते दहशतवादविरोधी आणि आण्विक विषयांमध्ये तज्ज्ञ आहेत. डॉ. पी. के. मिश्रा हे १९७२ च्या बॅचचे निवृत्त अधिकारी आहेत. ते भारत सरकारच्या कृषी सचिव पदावरून निवृत्त झाल्यानंतर मागील दोन टर्म पंतप्रधान नरेंद्र मोदी यांच्यासोबत आहेत. हे दोघेही पंतप्रधान मोदींच्या सर्वांत विश्वासू लोकांपैकी मानले जातात. अजित डोवाल यांनी पंजाबमध्ये आयबीचे ऑपरेशनल चीफ आणि काश्मीरमध्ये अतिरिक्त संचालक म्हणून काम केले आहे. त्यामुळे या दोन्ही संवेदनशील भागात पाकिस्तानच्या कारस्थानाचा त्यांना थेट अनुभव आहे.
