नोव्हाक जोकोविचचा सलग दुस-यांदा पराभव
लंडन : वृत्तसंस्था
आघाडीचा टेनिसपटू सर्बियाच्या नोव्हाक जोकोविचला विम्बल्डनच्या निर्णायक सामन्यात स्पेनच्या २१ वर्षीय कार्लोस अल्काराझने पराभूत करत विम्बल्डन ग्रँडस्लॅम जिंकली. रविवारी (१४ जुलै २०२४) झालेल्या अंतिम सामन्यात अव्वल स्थानावर असणा-या कार्लोस अल्काराझने अनुभवी नोव्हाक जोकोविचचा पराभव केला. लंडनच्या सेंटर कोर्टवर हा सामना रंगला. कार्लोसने विम्बल्डन चषकात सर्बियाच्या जोकोविचचा सलग दुस-यांदा पराभव करीत चषक पटकावला. नोव्हाक जोकोविचचा ६-२, ६-२, ७-५ असा पराभव झाला. २४ वेळा ग्रँडस्लॅमवर नाव कोरणा-या नोव्हाक जोकोविचला गतवर्षीही अल्काराझनेच पराभूत केले होते.
२ विम्बल्डन जिंकणारा ६ वा टेनिसपटू
फ्रेंच ओपन आणि विम्बल्डन सलग जिंकणारा कार्लोस अल्काराझ ६ वा खेळाडू ठरला. तसेच वयाच्या २२ वर्षांपूर्वी दोन विम्बल्डन विजेतेपद पटकाविणारा बोरिस बेकर आणि ब्योर्न बोर्ग यांच्यानंतरचा तिसरा खेळाडू ठरला. स्पॅनिश टेनिसपटू अल्काराझ हा स्पेनमधील एल पालमार गावचा रहिवाशी आहे. त्याने अनेक स्पॅनिश आणि युरोपियन चॅम्पियनशिप जिंकल्या.
नोव्हाकचे स्वप्न भंगले
३७ वर्षीय नोव्हाक जोकोविचने अंतिम सामना जिंकला असता तर त्याने इतिहासात नाव कोरले असते. कारण टेनिसच्या इतिहासात ग्रँडस्लमचे सर्वाधिक एकेरी विजेतेपद जिंकणारा खेळाडू बनण्याची संधी होती. परंतु कार्लोस अल्काराझने त्याचा स्वप्नभंग केला.
रॉजर फेडररची बरोबरी
कार्लोस अल्काराझने चौथे ग्रँडस्लॅम जिंकून महान टेनिसपटू रॉजर फेडररची बरोबरी केली. फेडररनंतर कार्लोस अल्काराझ पहिले ४ ग्रँडस्लॅम सामने जिंकणारा दुसरा खेळाडू ठरला. कार्लोसने आतापर्यंत दोनदा विम्बल्डन, एकदा फ्रेंच ओपन आणि एकदा यूएस ओपनची अंतिम फेरी गाठली आणि चारही वेळा तो जिंकला.
