मास्को : वृत्तसंस्था
युक्रेनचे राष्ट्राध्यक्ष वोलोडिमिर झेलेन्स्की यांनी देशाला संबोधित करताना युक्रेनच्या सैन्याने रशियाच्या कुर्स्क भागातील ७४ गावे ताब्यात घेतली आहेत. युक्रेनचे सैन्य पुढे जात आहे आणि रशियन सैन्याला ताब्यात घेत आहे. युक्रेनने अचानक केलेल्या हल्ल्यानंतर २ लाख रशियन नागरिकांना घर सोडून पळून जावे लागले. त्यांना सुरक्षित स्थळी पाठवण्यात आले आहे.
युक्रेनने ६ ऑगस्ट रोजी रशियाच्या कुर्स्क भागावर हल्ला केला. १३ ऑगस्टपर्यंत त्यांनी १००० चौरस किमी क्षेत्र काबीज केले. दुस-या महायुद्धानंतर कोणत्याही देशाने रशियाच्या हद्दीत घुसखोरी करण्याची ही पहिलीच वेळ आहे. २४ फेब्रुवारी २०२२ रोजी सुरू झालेल्या रशिया-युक्रेन युद्धाला नुकतेच ९०० दिवस पूर्ण झाले. अडीच वर्षांपासून सुरू असलेल्या या युद्धात शेवटचा आठवडा रशियासाठी अत्यंत वाईट ठरला. युक्रेनने पहिल्यांदाच रशियाला प्रत्युत्तर दिले.
