बंगळुरू : वृत्तसंस्था
आयपीएलचा हंगाम २०२५ च्या सुरुवातीला आहे. परंतु आयपीएल संघांनी अताापासूनच तयारी सुरू केली आहे. यासंदर्भात बीसीसीआय लवकरच रिटेनशन पॉलिसी जारी करणार आहे. दरम्यान, बीसीसीआयचे सचिव जय शाह यांनी शनिवार, दि. २८ सप्टेंबर २०२४ रोजी आयपीएलच्या खेळाडूंसाठी मोठी घोषणा केली. त्यानुसार आता प्रत्येक सामन्यांसाठी आयपीएल खेळाडूंना पैसे मिळणार आहेत. प्रतिसामन्यासाठी ७.५ लाख रुपये देण्यात येणार आहेत. तसेच आयपीएलच्या एका हंगामात सर्व साखळी सामने खेळणा-या क्रिकेटपटूला कराराच्या रकमेव्यतिरिक्त १ कोटी ०५ लाख रुपये बोनसही मिळणार आहे. त्यामुळे आयपीएल क्रिकेटर्स आणखी मालामाल होणार आहेत.
पुढील वर्षाच्या आयपीएल सामन्यांची तयारी आतापासूनच सुरू झाली आहे. आयपीएलमधील संघांसोबत आता बीसीसीआयनेही तयारी सुरू केली आहे. आयपीएल गव्हर्निंग कौन्सिलची आज बंगळुरू येथे बैठक झाली. या बैठकीत आगामी आयपीएल हंगामाबद्दल महत्त्वाचे निर्णय घेण्यात आले. आयपीएल गव्हर्निंग कौन्सिलमध्ये ६ सदस्यांचा समावेश आहे. यामध्ये आयपीएल चेअरमन अरुण धुमाळ, बीसीसीआय सचिव जय शाह आणि बीसीसीआय कोषाध्यक्ष आशिष शेलार यांचा समावेश होतो. विशेष म्हणजे बीसीसीआयची वार्षिक बैठकही उद्या २९ सप्टेंबर रोजी फोर सीझन होटेलमध्ये होत आहे. ज्यामध्ये भारतीय क्रिकेटमधील प्रमुख व्यक्ती उपस्थित राहतील. दरम्यान, आजच्या बैठकीनंतर बीसीसीआय सचिव जय शाह यांनी आयपीएल क्रिकेटपटूंच्या मानधनात वाढ करण्याची घोषणा केली.
आयपीएल हंगामांचे सातत्य टिकवण्यासाठी आणि उत्कृष्ट कामगिरीचा आनंद साजरा करण्यासाठी आम्ही आमच्या क्रिकेटपटूंसाठी मानधनात वाढ करत असल्याचे जय शाह म्हणाले. त्यानुसार आयपीएल खेळणा-या क्रिकेटर्संना प्रत्येक सामन्यासाठी ७.५ लाख रुपये देण्यात येणार आहेत. तसेच आयपीएलच्या एका हंगामात सर्व साखळी सामने खेळणा-या क्रिकेटपटूला कराराच्या रकमेव्यतिरिक्त १ कोटी ५ लाख रुपये बोनसही मिळणार आहेत.
फ्रँचायझीलाही १२.६० कोटी मिळणार
जय शाह यांनी प्रत्येक फ्रँचायझीला एका हंगामासाठी मॅच फी म्हणून १२.६० कोटी रुपये देण्यात येतील, अशीही घोषणा आपल्या ट्विटरवरुन केली. आयपीएल आणि खेळाडूंसाठी हे एक नवीन युग आहे, असे म्हणत जय शाह यांनी ही ऐतिहासिक घोषणा केली. त्यामुळे अगोदरच कोट्यवधींची बोली लागून कोट्यधीश झालेल्या आयपीएल खेळाडूंवर आणखी पैशांचा पाऊस पडणार आहे.
