कुसुमाग्रज प्रतिष्ठानच्या वतीने घोषणा
नाशिक : प्रतिनिधी
कुसुमाग्रज प्रतिष्ठानच्या वतीने दिल्या जाणा-या जनस्थान पुरस्काराची घोषणा करण्यात आली आहे. यंदाचा जनस्थान पुरस्कार मराठी नाटककार,अभिनेते आणि नाट्य दिग्दर्शक अशी ओळख असलेले सतीश आळेकर यांना जाहीर झाला आहे. कुसुमाग्रज प्रतिष्ठानतर्फे या मानाच्या पुरस्काराचे वितरण १० मार्च रोजी गुरुदक्षिणा सभागृह नाशिक येथे होणार आहे. एक लाख रुपये, मानपत्र आणि सन्मानचिन्ह असे जनस्थान पुरस्काराचे स्वरुप आहे.
सतीश आळेकर यांचे नाट्य क्षेत्रात मोठे योगदान आहे. ‘घाशीराम कोतवाल’, ‘महानिर्वाण’, ‘महापूर’, ‘बेगम बर्वे’ या नाटकांसाठी प्रसिद्ध आणि भारतीय रंगभूमीवर प्रभावशाली प्रगतीशील नाटककार म्हणून आळेकर सगळ््यांनाच परिचित आहेत. प्रतिष्ठानचे अध्यक्ष वसंत डहाके आणि पुरस्कार समितीचे अध्यक्ष कुमार केतकर यांनी या पुरस्काराची घोषणा केली. वयाच्या ७५ व्या वर्षीही सतीश आळेकर हे ‘ठकीशी संवाद’ या नाटकाद्वारे रंगभूमीवर सक्रिय आहेत. महानिर्वाण नाटकाला यंदा ५० वर्षे होत आहेत. ड्युक विद्यापीठातील अध्यापन, एनएसडीचे संचालक पद, नाटकककार विकास योजना, प्रादेशिक थिएटर ग्रुप डेव्हलपमेंटची संकल्पना, फोर्ड फाउंडेशन यातील सक्रिय सहभाग, आंतरराष्ट्रीय नाटकांच्या अनुवाद प्रकल्पांना सहकार्य, ललित कला केंद्राचे प्रमुखपद आणि नाटक, चित्रपट यासाठी अजूनही आळेकरांचा सक्रिय सहभाग या त्यांच्या संपूर्ण कारकिर्दीचा विचार करून त्यांची पुरस्कारासाठी निवड करण्यात आली.२६ मार्च १९९० रोजी कुसुमाग्रज प्रतिष्ठानची स्थापना झाली. तेव्हापासून कुसुमाग्रजांनी मांडलेल्या उद्दिष्टांच्या पूर्तीसाठी प्रतिष्ठान कार्य करीत आहे.
जनस्थानचे आजपर्यंतचे मानकरी
विजय तेंडुलकर (१९९१), विंदा करंदीकर (१९९३), इंदिरा संत (१९९५), गंगाधर गाडगीळ (१९९७), व्यंकटेश माडगूळकर (१९९९), श्री. ना. पेंडसे (२००१), मंगेश पाडगावकर (२००३), नारायण सुर्वे (२००५), बाबूराव बागूल (२००७), ना. धों. महानोर (२००९), महेश एलकुंचवार (२०११), भालचंद्र नेमाडे (२०१३), अरुण साधू (२०१५), डॉ. विजया राजाध्यक्ष (२०१७), वसंत आबाजी डहाके (२०१९), मधु मंगेश कर्णिक (२०२१), आशा बगे असे आहेत.
