ट्रम्प यांचा इशारा, रशियाकडून स्वस्तात तेल खरेदीमुळे जळफळाट?
वॉशिंग्टन : वृत्तसंस्था
रशियाकडून सुरू असलेल्या तेल खरेदीमुळे अमेरिका भारतावर पुन्हा एकदा संतापला आहे. अमेरिकेचे राष्ट्राध्यक्ष डोनाल्ड ट्रम्प यांनी पुन्हा भारतावर अतिरिक्त टॅरिफ लावण्याची धमकी दिली आहे. भारत रशियाकडून स्वस्त दरात मोठ्या प्रमाणावर कच्चे तेल खरेदी करून ते आंतरराष्ट्रीय बाजारात महाग विकतो आणि मोठा नफा कमावतो. ट्रम्प यांच्या म्हणण्यानुसार भारताला रशिया-युक्रेन युद्धात होणा-या मानवी नुकसानीची पर्वा नाही. त्यामुळे भारतावर मोठ्या प्रमाणात टॅरिफ वाढवणार असल्याचे ट्रम्प म्हणाले.
गेल्या आठवड्यातच ट्रम्प प्रशासनाने भारताकडून होणा-या आयातीवर २५ टक्के टॅरिफ लागू केला. याशिवाय रशियाकडून लष्करी उपकरणे आणि ऊर्जा खरेदीबाबत अतिरिक्त दंड लावण्याची शक्यता असून, याबाबतचा निर्णय लवकरच घोषित होणार आहे. परंतु या निर्णयावर भारत सरकारने अमेरिकेसोबत १० ते १५ टक्के टॅरिफबाबत चर्चा सुरू होती. परंतु २५ टक्के टॅरिफ लावण्याचा अमेरिकेचा निर्णय एकतर्फी आहे. राष्ट्रीय हितासाठी आवश्यक ती सर्व पावले उचलली जातील, असे केंद्रीय वाणिज्य मंत्री पियूष गोयल यांनी सांगितले.
अमेरिकेचे परराष्ट्रमंत्री मार्को रूबियो यांनी भारताच्या रशियन तेल खरेदीवर आक्षेप घेतला. या खरेदीचा फायदा थेट मॉस्कोच्या युद्धयंत्रणेला होतो, असे ते म्हणाले. मात्र, भारतीय परराष्ट्र मंत्रालयाचे प्रवक्ते रणधीर जायसवाल यांनी स्पष्ट केले की, भारत आपल्या ऊर्जा गरजा जागतिक परिस्थिती आणि उपलब्धतेनुसार ठरवतो. आमचे निर्णय पूर्णपणे राष्ट्रीय गरजा आणि स्वावलंबन यावर आधारित असतात. भारतावर लादण्यात आलेला टॅरिफ फक्त व्यापार संबंधावरच नव्हे, तर जागतिक राजकारणावरही परिणाम करू शकतो. अमेरिका आणि भारत या दोन महत्त्वाच्या भागीदार देशांमध्ये निर्माण होणारे हे तणाव भविष्यातील धोरणात्मक निर्णयांवर प्रभाव टाकण्याची शक्यता आहे.
६९ देशांवर वाढीव कर
अमेरिकेचे अध्यक्ष डोनाल्ड ट्रम्प यांनी आंतरराष्ट्रीय व्यापारात खळबळ माजवत भारतासह ६९ देशांवर मोठे टॅरिफ लावले. या आधी ज्या देशांशी व्यापार तूट होती ती भरुन काढण्याचे ध्येय ट्रम्प यांनी बाळगले. व्यापारातून मिळवणा-या अब्जावधी डॉलर्सच्या माध्यमातून अमेरिका आपले कर्ज फेडणार असल्याचे ट्रम्प म्हणाले. हे धोरण फक्त टॅरिफच्या रूपात दंड नाही, तर तो अमेरिकेच्या आर्थिक स्वावलंबनाचा भाग आहे, असेही ट्रम्प यांनी सांगितले.
