एका कॅलेंडर वर्षात १ हजार धावा पूर्ण
विशाखापट्टणम : वृत्तसंस्था
टीम इंडियाची स्टार ओपनर स्मृती मानधना एका कॅलेंडर वर्षात महिला एकदिवसीय सामन्यांमध्ये १ हजार धावा पूर्ण करणारी पहिली फलंदाज ठरली. यापूर्वी इतर कोणत्याही महिला खेळाडूने हा पराक्रम केला नव्हता.
याआधीचा सर्वोत्तम विक्रम ऑस्ट्रेलियाच्या माजी कर्णधार बेलिंडा क्लार्कच्या नावावर होता, ज्यांनी १९९७ मध्ये महिलांच्या एकदिवसीय सामन्यात ८०.८३ च्या सरासरीने ९७० धावा केल्या होत्या. टीम इंडियाने १२ ऑक्टोबर रोजी ऑस्ट्रेलियाविरुद्ध आयसीसी महिला क्रिकेट वर्ल्डकपमध्ये चौथा सामना खेळला. विशाखापट्टणम येथील एसीए-व्हीडीसीए क्रिकेट स्टेडियमवर झालेल्या या सामन्यात ऑस्ट्रेलियाने भारताचा पराभव केला.
१४ व्यांदा ५० पेक्षा जास्त धावांची भागीदारी
स्मृती मानधना आणि प्रतिका रावल यांनी महिलांच्या एकदिवसीय सामन्यात १४ व्यांदा ५० पेक्षा जास्त धावांची भागीदारी केली. त्यामुळे त्या ५० पेक्षा जास्त धावांची भागीदारी करणा-या दुस-या भारतीय खेळाडू बनल्या आहेत. स्मृती आणि प्रतिका यांनी अंजुम चोप्रा आणि मिताली राज यांना मागे टाकले. ज्यांनी महिलांच्या एकदिवसीय सामन्यात १३ वेळा ५० पेक्षा जास्त धावांची भागीदारी केली होती.
स्मृती मानधनाच्या
५ हजार धावा पूर्ण
स्मृती मानधनाने महिला एकदिवसीय सामन्यांमध्ये ५ हजार धावा पूर्ण केल्या. ही कामगिरी करणारी ती दुसरी भारतीय आणि जगातील पाचवी खेळाडू ठरली. स्मृतीने फक्त ११२ डावांमध्ये हा टप्पा गाठला. महिला एकदिवसीय सामन्यांमध्ये सर्वात कमी डाव आणि चेंडूंमध्ये ५ हजार धावा पूर्ण करणारी ती खेळाडू ठरली. तिने स्टेफनी टेलर (१२९ डाव) आणि सुझी बेट्स (६१८२ चेंडू) यांचे विक्रम मोडले.
