डाळ स्वावलंबन, धन धान्य कृषी योजना सुरू
नवी दिल्ली : वृत्तसंस्था
पंतप्रधान नरेंद्र मोदी यांनी शनिवार, दि. ११ ऑक्टोबर २०२५ रोजी शेतक-यांसाठी ३५,४४० कोटींच्या २ योजना सुरू केल्या. ‘डाळ स्वावलंबन अभियान’ आणि ‘पंतप्रधान धन-धान्य कृषी योजना’ अशी या योजनांची नावे आहेत. समाजवादी नेते जयप्रकाश नारायण यांच्या जयंतीनिमित्त एक कार्यक्रम आयोजित करण्यात आला होता. यात पंतप्रधानांनी कृषी, पशुपालन, मत्स्यपालन आणि अन्न प्रक्रिया क्षेत्रातील ५४५० कोटींपेक्षा जास्त किमतीच्या प्रकल्पांचे उद्घाटन केले. तसेच ८१५ कोटी रूपयांच्या इतर प्रकल्पांची पायाभरणी केली.
‘डाळ स्वावलंबन अभियान’ या योजनेवर ११,४४० कोटी रुपये खर्च केले जाणार आहेत. या योजनेच्या माध्यमातून २०३०-३१ सालापर्यंत डाळींचे उत्पादन सध्याच्या २५.२३८ दशलक्ष टनांवरून ३५ दशलक्ष टनांपर्यंत वाढवणे आणि देशाचे आयात अवलंबित्व कमी करण्याचे सरकारचे उद्दिष्ट आहे. पंतप्रधान धन-धान्य कृषी योजनेवर सरकार २४ हजार कोटी रुपये खर्च करणार आहे. या योजनेच्या माध्यमातून कृषी क्षेत्रात मागास असणा-या १०० जिल्ह्यांचा कायपालट करण्याची सरकारची योजना आहे. ही योजना पीक उत्पादन, वेगवेगळी पिके घेण्यास शेतक-यांना मदत करणे, सिंचन आणि पाणी साठवणूक क्षमता सुधारणे आणि शेतक-यांना सहज कर्ज उपलब्ध करुन देण्यास फायदेशीर ठरणार आहे. दोन्ही योजनांना आधीच मंत्रिमंडळाची मंजुरी मिळाली. या योजना येत्या रबी हंगामापासून २०३०-३१ पर्यंत चालू रागणार आहेत.
विविध प्रकल्पांचे उद्घाटन
पंतप्रधान नरेंद्र मोदी यांनी विविध प्रकल्पांचे उद्घाटनही केले. यात बेंगळुरू आणि जम्मू आणि काश्मीरमधील कृृत्रिम रेतन प्रशिक्षण केंद्रे, अमरेली आणि बनासमधील उत्कृष्टता केंद्रे, राष्ट्रीय गोकुळ अभियानांतर्गत आसाममधील आयव्हीएफ प्रयोगशाळा, मेहसाणा, इंदूर आणि भिलवाडा येथील दूध पावडर प्लांट आणि प्रधानमंत्री मत्स्य संपदा योजनेअंतर्गत तेजपूर येथे मासेमारीचा प्लांट या प्रकल्पांचा समावेश आहे.
