जेरुसलेम : डोनाल्ड ट्रम्प यांच्या पुढाकाराने आकारास आलेल्या गाझा शांतता करारामुळे गेल्या २ वर्षांपासून होरपळत असलेल्या गाझापट्टीत शांतता नांदेल, असे मानण्यात येत होते. परंतु पॅलेस्टीनी दहशतवादी संघटना असलेल्या हमासने इजिप्तमध्ये होणा-या गाझा शांतता करारावर अधिकृतरित्या स्वाक्षरी करण्यास नकार दिला.
डोनाल्ड ट्रम्प यांनी गाझामध्ये शांतता प्रस्थापित करण्यासाठी आणलेल्या या कराराच्या काही भागांवर आपले आक्षेप असल्याचे हमासने म्हटले. त्यामुळे या शांतता कराराचे भवितव्य अधांतरी लटकले आहे. तसेच गाझात शांतता प्रस्थापित व्हावी, यासाठी हमासच्या सदस्यांनी गाझापट्टी सोडावी, या डोनाल्ड ट्रम्प यांनी दिलेल्या सल्ल्याची हमासच्या सदस्यांनी खिल्ली उडविली.
पॅलेस्टाईनींना मग ते हमासचे सदस्य असोत वा नसोत त्यांच्या भूमीवरून बाहेर काढण्याची सूचना पूर्णत: मुर्खपणाची आहे. यात गुंतागुंत असल्याने शांतता प्रस्तावारतील दुस-या टप्प्याबाबत चर्चा करणे कठीण होईल, असे राजकीय ब्युरोचे सदस्य होसम बदरान यांनी म्हटले आहे. गाझा शांतता कराराबाबत हमासने ही टिप्पणी अमेरिकेचे राष्ट्राध्यक्ष डोनाल्ड ट्रम्प यांच्या मध्य पूर्वेतील दौ-यापूर्वी केली. या शांतता करारात अनेक राजकीय अडथळे आहेत. हमासने शस्त्रे खाली ठेवावीत, अशीही एक अट आहे. हमास गाझा सरकारमधून बाजूला होईल. परंतु शस्त्र खाली ठेवू शकत नाही, असे हमासच्या वरिष्ठ अधिका-याने सांगितले.
