-कोकणसह मराठवाडा, विदर्भात २० हजार लोकांना रोजगार मिळणार
मुंबई : प्रतिनिधी
मुख्यमंत्री एकनाथ शिंदे यांच्या अध्यक्षतेखाली झालेल्या उद्योग विभागाच्या मंत्रिमंडळ उपसमितीच्या बैठकीत मंगळवार, दि. ३० जुलै २०२४ रोजी ७ विशाल आणि अतिविशाल प्रकल्पांना मंजुरी देण्यात आली. या प्रकल्पांच्या माध्यमातून कोकणसह मराठवाडा व विदर्भात ८१ हजार १३७ कोटी रुपये गुंतवणूक होणार असून सुमारे २० हजार जणांना प्रत्यक्ष रोजगार उपलब्ध होणार आहे. आज मंजुरी देण्यात आलेल्या प्रकल्पात उच्च तंत्रज्ञानावर आधारित लिथियम बॅटरी, इलेक्ट्रिल व्हेईकल, सेमीकंडक्टर चिप, फळांचा पल्पनिर्मिती आदी प्रकल्पांचा समावेश आहे.
या बैठकीत उच्च तंत्रज्ञानावर आधारित लिथियम आयन सेल/बॅटरी, इलेक्ट्रिल व्हेईकल, सेमीकंडक्टर चिप्स, सोलर पीव्ही मॉड्युल्स आणि इलेक्ट्रोलायझर, फळाचा पल्प आणि रस यावर आधारित उत्पादन प्रकल्पांना मंजुरी देण्यात आली. उद्योगांना राज्यातील गुंतवणूक करण्यासाठी प्रोत्साहन देणे आवश्यक असून औद्योगिक धोरणानुसार सामूहिक प्रोत्साहन योजनेंतर्गत विविध प्रोत्साहने जाहीर करण्यात आली असल्याचे मुख्यमंत्री एकनाथ शिंदे यांनी सांगितले. आरआरपी इलेक्ट्रॉनिक्स कंपनीमार्फत सेमीकंडक्टर चिप्स निर्मितीचा एकात्मिक प्रकल्प तळोजा, पनवेल येथे उभारण्यात येणार आहे. महाराष्ट्रातला हा पहिलाच सेमीकंडक्टर निर्मिती करणारा प्रकल्प आहे. या प्रकल्पामध्ये प्रथम टप्प्यात १२ हजार कोटी एवढी गुंतवणूक होणार आहे. ४००० पेक्षा अधिक रोजगारनिर्मिती होणार आहे. महापे, नवी मुंबई येथे प्रकल्पाचे काम सुरू झाले असून प्रायोगिक तत्त्वावर सप्टेंबर २०२४ पर्यंत सुरू होणार आहे. या शिवाय जेएसडब्ल्यू एनर्जी पीएसपी इलेव्हन लि., यांचा लिथियम बॅटरी निर्मितीचा प्रकल्प नागपूर भागात होणार आहे. प्रकल्पामध्ये एकूण २५ हजार कोटी एवढी गुंतवणूक होणार आहे. ५००० पेक्षा अधिक रोजगारनिर्मिती होणार आहे.
हिंदुस्थान कोकाकोला बेव्हरेज मार्फत फळाचा पल्प आणि रस यावर आधारित उत्पादन निर्मितीचा विशाल प्रकल्प रत्नागिरी येथे होणार आहे. १५०० कोटी एवढी गुंतवणूक होणार आहे. आवाडा इलेक्ट्रो कंपनीचा सोलर पीव्ही मॉड्युल्स आणि इलेक्ट्रोलायझरचा एकात्मिक प्रकल्प अतिरिक्त एमआयडीसी, बुटीबोरी जि. नागपूर आणि एमआयडीसी भोकरपाडा, ता. पनवेल, जि. रायगड या परिसरात उभारण्यात येणार आहे. कंपनीमार्फत नवीकरणीय ऊर्जा स्त्रोताचा उच्च तंत्रज्ञानावर आधारित राज्यात प्रकल्प स्थापित होणार आहे. परनॉर्ड रिकार्ड इंडिया प्रा. लिमिटेड मार्फत मद्यार्क निर्मितीचा विशाल प्रकल्प अतिरिक्त बुटीबोरी एमआयडीसी, नागपूर येथे स्थापन करण्याचे नियोजित आहे. प्रकल्पामध्ये १७८५ कोटी एवढी गुंतवणूक होणार आहे.
संभाजीनगरला हायब्रीड
वाहननिर्मिती प्रकल्प
आज मंजुरी देण्यात आलेल्या प्रकल्पांमध्ये इलेक्ट्रिक आणि हायब्रीड वाहननिर्मिती प्रकल्पाचा समावेश आहे. जेएसडब्ल्यू ग्रीन मोबिलिटी लि. कंपनी ही कंपनी छत्रपती संभाजीनगर येथे हा प्रकल्प उभारणार आहे. एवढ्या मोठ्या प्रमाणात गुंतवणूक होणारा राज्यातील पहिलाच अतिविशाल प्रकल्प आहे. या प्रकल्पामध्ये एकूण २७ हजार २०० कोटी एवढी गुंतवणूक होणार असून ५२०० पेक्षा अधिक रोजगारनिर्मिती होणार आहे. या प्रकल्पामध्ये वर्षाला ५ लाख इलेक्ट्रिक प्रवासी कार व १ लाख व्यावसायिक कार निर्मिती होणार आहे.
