मुंबई : प्रतिनिधी
भारत आणि पाकिस्तानमध्ये आता युद्ध सुरू झाले असून, कोणत्याही क्षणी हल्ल्याची शक्यता लक्षात घेऊन तणावाच्या पार्श्वभूमीवर बीसीसीआयने सध्या सुरू असलेल्या आयपीएल स्पर्धांना स्थगिती दिली. आता उर्वरित सामने स्थगित नंतर घेण्यात येणार आहेत. बीसीसीआयने याबाबत अधिकृत घोषणा केली. आयपीएलचे एकूण १६ सामने शिल्लक आहेत. आता हे सामने नक्की कधी खेळवण्यात येतील, याबाबत माहिती देण्यात आलेली नाही.
पाकिस्तानकडून ८ तारखेच्या रात्री भारतावर ड्रोन हल्ले करण्यात आले. त्यामुळे धर्मशाला इथे सुरु असलेला पंजाब किंग्सविरुद्ध दिल्ली कॅपिटल्सचा सामना मध्येच थांबवण्यात आला होता. त्यानंतर रात्रभर भारताची धडक कारवाई, पाकिस्तानकडून अधून मधून होणारे हल्ले, या पार्श्वभूमीवर बीसीसीआयकडून आयपीएलचे उर्वरित सामने स्थगित करण्याचा निर्णय घेण्यात आला.
आयपीएलमध्ये एकूण ७४ सामने खेळवले जाणार आहेत. २२ मार्चपासून सुरु झालेल्या आयपीएल स्पर्धेचा अंतिम सामना २५ मे रोजी कोलकात्यातील ईडन गार्डन्स मैदानावर खेळवण्याचे नियोजित होते. मात्र, आता या सर्व स्पर्धांवर टांगती तलवार आहे. दरम्यान, तिकडे पाकिस्तानात झालेल्या हल्ल्यांनी पाकच्या क्रिकेट लीगवरही परिणाम झाला आहे. पाकिस्तानच्या रावळपिंडी मैदानावर ड्रोन हल्ला झाला होता. त्यामुळे तेथील पीएसएलचे सामने रद्द केले होते. आता पीएसएलचे उर्वरित सामने दुबईत खेळवण्यात येणार आहेत.
पाकिस्तानी सैन्याने गुरुवारी रात्री भारताच्या सीमावर्ती भागात हवाई हल्ले केले होते. त्यानंतर भारतीय सैन्याने प्रत्युत्तर म्हणून पाकिस्तानातील प्रमुख शहर आणि कराची बंदरावर हल्ला केला होता. आयपीएलमधील सर्व संघांमध्ये अनेक परदेशी खेळाडू आहेत. भारत आणि पाकिस्तान यांच्यातील वाद चिघळल्याने या परेदशी खेळाडूंच्या सुरक्षेचा प्रश्न निर्माण झाला आहे. आयपीएल स्पर्धा तुर्तास थांबवून उर्वरित आयपीएलची स्पर्धा अनिश्चित काळासाठी स्थगित करण्याचा निर्णय बीसीसीआयने घेतला.
