नवी दिल्ली : वृत्तसंस्था
भारताच्या तिजोरीत मोठी भर पडली आहे. जून २०२५ मध्ये भारताचा वस्तू आणि सेवा कर (जीएसटी) संग्रह १.८५ लाख कोटी रुपये होता, जो गेल्या वर्षीच्या जूनपेक्षा ६.२ टक्के जास्त आहे. सरकारने मंगळवार, दि. १ जुलै २०२५ रोजी हे आकडे जाहीर केले. जूनमधील संग्रह मे महिन्यापेक्षा किंचित कमी होता, कारण एप्रिल २०२५ मध्ये २.३७ लाख कोटी रुपये आणि मे महिन्यात २.०१ लाख कोटी रुपयांचा विक्रमी संग्रह झाला होता.
जीएसटीने अंमलबजावणीची आठ वर्षे पूर्ण केली आहेत. या काळात संकलनात प्रचंड वाढ झाली आहे. सरकारच्या मते, गेल्या पाच वर्षांत जीएसटी संकलन दुप्पट झाले आहे. आर्थिक वर्ष २०२५ मध्ये एकूण २२.०८ लाख कोटी रुपये जमा झाले, जे आर्थिक वर्ष २०२१ मधील ११.३७ लाख कोटी रुपयांपेक्षा खूपच जास्त आहे. या आकडेवारीवरून असे दिसून येते की, जीएसटी प्रणाली आता देशाच्या अर्थव्यवस्थेचा एक मजबूत आधारस्तंभ बनली आहे.
