मुंबई : प्रतिनिधी
पवित्र रिश्ता, साथ निभाना साथियाँ, तुझेच मी गीत गात आहे, यांसारख्या हिंदी आणि मराठी मालिकांमधून आपल्या दमदार अभिनयकौशल्याची छाप सोडणारी अभिनेत्री प्रिया मराठेचे निधन झाले आहे. वयाच्या ३८ व्या वर्षी तिने अखेरचा श्वास घेतला आहे. रविवार दि. ३१ आगस्ट २०२५ रोजी पहाटे ४ वाजता कर्करोगाने प्रियाचे निधन झाल्याची माहिती समोर येत आहे.
गेल्या वर्षभरापासून प्रिया लाइमलाइटपासून दूरच होती. सोशल मीडियावरही ती सक्रिय नव्हती. अचानक तिच्या निधनाची बातमी समोर आल्यानंतर मराठी कलाविश्वावर शोककळा पसरली आहे. प्रिया शेवटची तुझेच मी गीत गात आहे. या मालिकेतून प्रेक्षकांच्या भेटीला आली होती. परंतु ही मालिकासुद्धा तिने मध्येच सोडली होती. सोशल मीडियावर एक व्हिडीओ पोस्ट करत तिने याबद्दलची माहिती चाहत्यांना दिली होती. त्यात तिने आरोग्याचे कारण दिले होते.
आरोग्याच्या कारणास्तव मी तुझेच मी गीत गात आहे. या मालिकेचा निरोप घेत आहे. या मालिकेत मोनिकाची भूमिका साकारताना मी खूप खुश होते, परंतु शूटिंगचे शेड्युल आणि आरोग्य या दोन्ही गोष्टींमध्ये समतोल साधणे खूप कठीण होत आहे. म्हणूनच मी हा प्रवास इथेच थांबवण्याचा निर्णय घेतला आहे, असे तिने या व्हिडीओत म्हटले होते.
प्रियाने या सुखांनो या या मालिकेतून टेलिव्हिजनवर पदार्पण केले होते. त्यानंतर तिने अनेक मराठी मालिकांमध्ये दमदार भूमिका साकारल्या होत्या. चार दिवस सासूचेमध्येही ती झळकली होती. त्यानंतर कसम से या मालिकेतून तिने हिंदी टेलिव्हिजन क्षेत्रात पाऊल ठेवले होते. पवित्र रिश्ता या लोकप्रिय मालिकेत तिने वर्षाची भूमिका साकारली होती. बडे अच्छे लगते है या गाजलेल्या मालिकेत ती ज्योती मल्होत्राच्या भूमिकेत होती. प्रिया मराठेने २४ एप्रिल २०१२ रोजी अभिनेता शंतनू मोघेशी लग्न केले होते.
छोट्या पडद्यावरील मालिकांमध्ये प्रिया मराठे घराघरात पोहोचली होती. प्रेक्षकांच्या मनात तिने अढळ स्थान निर्माण केले होते. भूमिका नकारात्मक असली तरी त्यातूनही तिने प्रेक्षकांची मने जिंकली होती. प्रिया मराठेचा जन्म २३ एप्रिल १९८७ रोजी ठाणे, महाराष्ट्र येथे झाला होता. मराठी सांस्कृतिक पार्श्वभूमी असलेल्या घरात तिचे बालपण गेले. अकरावीत शिकत असताना प्रियाला महाविद्यालयीन नाट्य स्पर्धेत भाग घेण्याची संधी मिळाली. तिथूनच तिच्या अभिनयाची सुरुवात झाली. २००५ साली या सुखानो या या मालिकेतून तिने छोट्या पडद्यावर पदार्पण केले. त्यानंतर मराठी आणि हिंदी मालिकांमधून तिने आपल्या अभिनयातून स्वतंत्र छाप सोडली.
