विशाखापट्टणम : वृत्तसंस्था
जगातील आघाडीची टेक कंपना गुगल भारतात मोठी गुंतवणूक करणार आहे. कंपनीचे सीईओ सुंदर पिचाई यांनी भारताला एआय हब बनवण्यासाठी कंपनी भारतात १.३३ लाख कोटींची गुंतवणूक करणार आहे, असे म्हटले. गुगल आंध्र प्रदेशातील विशाखापट्टनममध्ये हे एआय हब उभारणार आहे. हे हब अमेरिकेबाहेरील कंपनीचे सर्वात मोठे हब असणार आहे. यासाठी गूगल पुढील पाच वर्षांमध्ये भारतात १५ अब्ज डॉलर्सची गुंतवणूक करणार आहे. याबाबत पंतप्रधान मोदींसोबत चर्चा झाली असून हे एक ऐतिहासिक पाऊल असल्याचे विधान सुंदर पिचाई यांनी केले.
मूळचे भारतीय वंशाचे असणारे सुंदर पिचाई यांनी याबाबत एक्सवर एक पोस्ट केली. यात भारताचे पंतप्रधान नरेंद्र मोदी यांच्याशी संवाद साधून आनंद झाला. आम्ही त्यांनी विशाखापट्टनममध्ये एआय हब तयार करण्याची आमची योजना सांगितली. या हबमध्ये गीगावॅट संगणकीय क्षमता आणि मोठ्या प्रमाणातील ऊर्जा पायाभूत सुविधांना एकत्र आणणार आहे. एआय हब तयार करण्यासाठी गुगल पुढील पाच वर्षांत १५ अब्ज अमेरिकन डॉलर खर्च करणार आहे. यात अदानी समुहासोबत पार्टनरशीप करत एक डेटा सेंटरचीही स्थापना केली जाणार आहे, असेही सांगितले.
