गडचिरोली : प्रतिनिधी
दंडकारण्यातील माओवादी चळवळीचा वरिष्ठ नेता व पॉलिट ब्युरो सदस्य मल्लोजुला वेणुगोपाल ऊर्फ भूपती ऊर्फ सोनू यांच्यासह एकूण ६१ जणांनी १४ ऑक्टोबर रोजी गडचिरोली पोलिसांपुढे शरणागती पत्करली. मुख्यमंत्री आणि पालकमंत्री देवेंद्र फडणवीस यांच्यासमोर आज १५ ऑक्टोबर रोजी सकाळी ११ वाजता सर्वांनी अत्मसमर्पण केले.
मुख्यमंत्र्यांसमोरच आत्मसमर्पण करण्याची अट भूपतीने घातली होती. आज माओवाद्यांच्या गणवेशातच भूपतीने आपल्याकडील शस्त्र मुख्यमंत्र्यांकडे सोपविले. यावेळी मुख्यमंत्र्यांनी त्यांच्या हाती संविधान देऊन त्यांचे स्वागत केले. ३ दशके माओवाद्यांच्या अगणित हिंसक कारवायांचा रणनितीकार राहिलेल्या भूपतीच्या चेह-यावर आत्मसमर्पणावेळी हास्य दिसून आले. हस्तांदोलनानंतर मुख्यमंत्री देवेंद्र फडणवीस यांनी त्याच्याशी संवाद साधला. यावेळी त्यांनी आता बंदुकीचा नक्षलवाद संपत आला आहे, पुढचा चॅलेंज हा शहरी नक्षलवाद आहे, असे स्पष्ट मत व्यक्त केले. तब्बल ४० वर्षे नक्षली चळवळीत सक्रिय असलेल्या आणि पॉलिटब्युरोचा सदस्य असलेल्या भूपतीवर विविध राज्यांमध्ये मिळून १० कोटी रुपयांपर्यंत बक्षीस होते.
पोलिसांच्या माहितीनुसार भूपती हा नक्षलवादी संघटनेतील दुस-या क्रमांकाचा मोठा नेता होता. १९७० च्या दशकात माओवादी संघटना पीपल्स वॉर ग्रुपमध्ये प्रवेश करणा-या भूपतीची कारकीर्द गडचिरोली जिल्ह्यातील सिरोंचा तालुक्यात सुरू झाली. भूपती हा नक्षलवादी नेता मल्लोजुला कोटेश्वरराव उर्फ किशनचा छोटा भाऊ आहे. नक्षलवाद्यांच्या संघटनेतील बौद्धिक चेहरा म्हणून भूपती प्रसिद्ध होता. गेली ४० वर्षे नक्षलवादी संघटनेच्या विस्तारासाठी सक्रिय असलेला भूपती हा केंद्रीय समिती आणि पोलिट ब्युरो सदस्यही होता. नक्षलवादी चळवळीतला जहाल नेता अशी त्याची ओळख होती.
