अहमदाबाद : वृत्तसंस्था
राष्ट्रकुल क्रीडा स्पर्धाच्या (कॉमनवेल्थ गेम) आयोजनासाठी आतापासूनच मोर्चेबांधणी सुरू झाली आहे. या स्पर्धेच्या कार्यकारी मंडळाने २०३० स्पर्धेच्या आयोजनासाठी चाचपणी सुरू केली आहे. त्यातच आता भारतातील अहमदाबादच्या नावाचा प्रस्ताव पुढे आला आहे. या स्पर्धेच्या यजमानपदाच्या शर्यतीत भारताने नायजेरियाला मागे टाकले. आता हा प्रस्ताव कॉमनवेल्थ क्रीडा स्पर्धेच्या सदस्यांपुढे ठेवण्यात येणार आहे. या प्रस्तावावर २६ नोव्हेंबर २०२५ रोजी ग्लासगो येथे मोहोर लागण्याची शक्यता आहे. भारताला हा मान मिळाला तर ७२ देशांचे आदरातिथ्य करण्याची संधी अहमदाबाद शहराला मिळणार आहे. कारण या स्पर्धेत ७२ देशांचे खेळाडू सहभागी होऊ शकतात. यापूर्वी २०१० मध्ये या स्पर्धेचे आयोजन भारतात केले होते.
कॉमनवेल्थ गेम्स मूल्यांकन समितीने सविस्तर आकलन करून हा प्रस्ताव पुढे ठेवला. सर्व प्रक्रियेचे पालन केल्यानंतर अहमदाबादची शिफारस करण्यात आली. तांत्रिक बाबी, खेळाडूंचा अनुभव, पायाभूत सुविधा, प्रशासन आणि कॉमनवेल्थ गेम्सची मूल्ये लक्षात घेऊन हा प्रस्ताव पुढे पाठवला आहे. अहमदाबादकडे क्रीडा क्षेत्रातील जागतिक दर्जाच्या सुविधा आणि आधुनिक सुविधांचे शहर म्हणून पाहिले जात आहे. क्रिकेटचे सर्वात मोठे स्टेडियमदेखील अहमदाबादमध्ये आहे. यापूर्वी पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत २०३० च्या कॉमनवेल्थ स्पर्धेसाठी बोली लावण्याच्या युवा व्यवहार आणि क्रीडा मंत्रालयाच्या प्रस्तावाला मंजुरी दिली होती.
