रेअर अर्थ मिनिरलचा पुरवठा थांबविला, चीनवर १०० टक्के ट्रम्पटॅरिफ
वाशिंग्टन : वृत्तसंस्था
अमेरिकेने जगभरात टॅरिफ वॉर सुरू केले आहे. भारत रशियाकडून तेल खरेदी करतो, म्हणून अमेरिकेने भारतावर ५० टक्के टॅरिफ लावण्याचा निर्णय घेतला. त्यानंतर अमेरिकेकडून ब्राझीलवर टॅरिफ लावण्यात आला. दरम्यान चीनवर आधीपासूनच टॅरिफ होता. मात्र, त्यातच आता चीनने अमेरिकेला होणा-या रेअर अर्थ मिनिरलचा पुरवठा थांबवल्याने चिडलेल्या डोनाल्ड ट्रम्प यांनी चीनवर आता तब्बल १०० टक्के टॅरिफ लावण्याचा निर्णय घेतला. १ नोव्हेंबर २०२५ पासून हा निर्णय लागू होणार आहे. या टॅरिफ वॉरमध्ये भारताचा फायदा होणार आहे. कारण चीनच्या वस्तूंवर टॅरिफ वाढविल्याने आता भारताच्या वस्तू स्वस्त होणार आहेत. यामुळे भारतीय वस्तूंना मागणी वाढू शकते.
अमेरिकेन चीनवर १०० टक्के टॅरिफ लावल्यामुळे चीनच्या वस्तू या अमेरिकेच्या बाजारात प्रचंड महाग होणार आहेत, त्याचा फायदा हा भारताला आपली निर्यात वाढवण्यासाठी होणार आहे. चीनच्या तुलनेत भारताच्या वस्तू स्वस्त असल्याने अमेरिकेत आता भारतीय वस्तूंची मागणी वाढण्याची शक्यता आहे. याबाबत भारतीय निर्यातदार संघटनेचे अध्यक्ष एस सी रल्हन यांनी म्हटले की, अमेरिकेने चीनवर लावलेल्या प्रचंड टॅरिफमुळे पुन्हा एकदा अमेरिकेच्या बाजारपेठेत भारतीय वस्तूंची मागणी वाढू शकते, त्याचा थेट फायदा हा भारताला होणार आहे.
गतवर्षी अमेरिकेला
८६ अब्ज डॉलर्सची निर्यात
भारताने २०२४-२५ मध्ये अमेरिकेला ८६ अब्ज डॉलरची निर्यात केली होती. आता चीन आणि अमेरिकेमध्ये तणाव निर्माण झाल्याने त्याचा थेट फायदा भारताला होणार आहे. अमेरिकेच्या घोषणेमुळे चिनी वस्तूंवर अमेरिकेत १३० टक्के टॅरिफ लावला जाणार आहे.
अमेरिकेलाही फटका
अमेरिकेतील उद्योग क्षेत्र पूर्णपणे रेअर अर्थ मिनिरल्ससाठी चीनवर अवलंबून आहे. परंतु आता चीनने मिनिरल्सचा पुरवठाच थांबविल्याने ट्रम्प यांनी चीनवर १०० टक्के टॅरिफ लावला. याचा फटका चीनला सोसावा लागणार असली तरी चीनच्या भूमिकेमुळे अमेरिकेलाही मोठा फटका बसणार आहे.
चीनचा अमेरिकेला दणका
चीनने सातत्याने अमेरिकेची कोंडी केली आहे. आधी रेअर अर्थ मिनरल्सचा पुरवठा रोखला. विशेष म्हणजे अमेरिकेत उत्पादित होणा-या सोयाबीनचा सर्वात मोठा खरेदीदार चीन आहे. मात्र, चीनने अमेरिकेकडून सोयाबीनची खरेदी थांबविली. त्यामुळे अमेरिकेत भूकंप झाला. अमेरिकन बाजारपेठांमध्ये हाहाकार उडाला. हजारो टन सोयाबीन घेऊन चीनकडे निघालेल्या अमेरिकन जहाजांना चीनने वाटेतच थांबवले. त्यामुळे खळबळ उडाली. यामुळे शेतकरी अडचणीत येण्याची शक्यता असून, आंदोलनही उभारले जाऊ शकते.
