६८ लाख ६७ हजार ७५६ हेक्टर क्षेत्रावरील पिकांचे नुकसान
मुंबई : प्रतिनिधी
राज्यात १ कोटी ४३ लाख ५२ हजार २८१ हेक्टर क्षेत्रावर पीक लागवड झाली. त्यापैकी ६८ लाख ६७ हजार ७५६ हेक्टर क्षेत्रावर अतिवृष्टीमुळे नुकसान झाले आहे. ज्या ठिकाणी घरांचे नुकसान झाले, तिथे नव्याने घरे बांधण्यासाठी प्रधानमंत्री आवास योजनेंतर्गत मदत करण्यात येणार आहे, तर डोंगरी भागात घरे बांधण्यासाठी अतिरिक्त १० हजारांची मदत देण्यात येईल. तसेच ज्या दुकानांचे नुकसान झाले तर त्यांना ५० हजार रुपये, मृत्यूमुखी पडलेल्या जनावरांसाठी तीन जनावरांची अट न ठेवता प्रतिजनावर ३७ हजार ५०० रुपये तर १०० रुपये प्रतिकोंबडी अशी भरपाई देण्यात येईल.
जमीन खरडून गेलेली शेती पुन्हा लागवडीयोग्य होण्यासाठी ४७ हजार रुपये प्रति हेक्टरी थेट मदत तर ३ लाख रुपये मनरेगा मधून दिले जातील. बाधित विहिरींसाठी विशेष बाब म्हणून प्रतिविहीर ३० हजार रुपये देण्यात येतील. त्याचप्रमाणे मत्स्यशेती तसेच बोटींच्या नुकसान भरपाईसाठी १०० कोटींची तरतूद केल्याचेही मुख्यमंत्री फडणवीस यांनी सांगितले.
शेतक-यांना मदत देताना ॲग्रीस्टॅकमधील माहिती ग्रा धरली जाईल. त्यासाठी कुठलीही कागदपत्रे सादर करण्याची आवश्यकता राहणार नाही. पायाभूत सुविधांच्या उभारणीसाठी १० हजार कोटी रुपये, तसेच पूरग्रस्तांसाठी जिल्हा नियोजन समितीच्या निधीतील ५ टक्के निधी राखीव ठेवण्यात आला आहे. या माध्यमातून १५०० कोटी उपलब्ध करुन देण्यात आले आहेत. या भागात टंचाई परिस्थितीत लागू असलेल्या सर्व सवलती ओली टंचाई समजून लागू करण्यात येणार आहेत.
असे आहे पॅकेज
मृतांच्या कुटुंबीयांना ४ लाख, जखमी व्यक्तींना ७४ हजार ते २.५ लाख रुपये, घरगुती भांडे, वस्तूंचे नुकसान : पाच हजार रुपये प्रति कुटुंब, कपडे, वस्तूंचे नुकसान : पाच हजार रुपये प्रतिकुटुंब, दुकानदार, टपरीधारक : ५० हजार रुपये, डोंगरी भागात पडझड, नष्ट पक्क्या घरांना : १ लाख २० हजार रुपये, डोंगरी भागात पडझड, नष्ट कच्च्या घरांना : १लाख ३० हजार रुपये, अंशत: पडझड : ६,५०० रुपये, झोपड्या : ८ हजार रुपये, जनावरांचे गोठे : तीन हजार रुपये, दुधाळ जनावरे : ३७,५०० रुपये, ओढकाम करणारी जनावरे : ३२ हजार रुपये, कुक्कुटपालन : १०० रुपये प्रति कोंबडी, खरडून गेलेल्या जमिनीसाठी ४७ हजार रुपये प्रतिहेक्टर थेट मदत आणि मनरेगाअंतर्गत ३ लाख रुपये प्रतिहेक्टर, खचलेली किंवा बाधित विहीर : ३० हजार रुपये प्रति विहीर.
