अफगाणिस्तानवर एअर स्ट्राईक

yongistan
By - YNG ONLINE


पाक घाबरला, १५ मिनिटांत शरणागती, ४८ तास युद्धविराम

काबुल : वृत्तसंस्था

पाकिस्तान आणि अफगाणिस्तानमध्ये सुरू असलेला संघर्ष थांबण्याचे नाव घेत नाही. पाकिस्तानने बुधवार, दि. १५ ऑक्टोबर २०२५ रोजी अफगाणिस्तानवर एअर स्ट्राईक केला. यावेळी पाकिस्तानने कंदहारला लक्ष्य केले. पाकिस्तानने केलेल्या हवाई हल्ल्यात अफगाणिस्तानचे अनेक लोक ठार झाल्याचा दावा पाकिस्तानने केला. तालिबाननेही जोरदार प्रतिहल्ला केला. त्यासाठी त्यांनी क्षेपणास्त्रांचा मारा केला. दरम्यान, पाकिस्तानने लगेचच सायंकाळी शस्त्रसंधीसाठी अफगाणिस्तानकडे विनवणी केली. त्यामुळे दोन्ही देशांत ४८ तासांसाठी युद्धविरामाची घोषणा करण्यात आली.  

पाकिस्तान आणि तालिबान यांच्यात सीमा भागात जोरदार चकमकी झाल्या. या तणावाच्या पार्श्वभूमीवर तालिबानने पाकिस्तान-अफगाणिस्तान मैत्रीचे प्रतीक मानला जाणारा फ्रेंडशीप गेट उडवून दिला. याला बाब-ए-दोस्त द्वार असेही म्हणतात. चमन सीमेवर हा पूल आहे, जो दोन्ही देशांमधील संबंधांचे प्रतीक मानला जात होता. हे द्वार उडवून दिल्यानंतर तालिबानने त्यांना काफिरांशी मैत्री नको आहे, असे म्हटले. या चकमकींमुळे पाकिस्तानने अफगाणिस्तानला लागून असलेल्या अनेक सीमा चौक्या बंद केल्या आहेत, ज्यात चमन क्रॉसिंगचाही समावेश आहे.

चमन सीमेवर 

जोरदार गोळीबार

चमन सीमेवर जोरदार गोळीबार झाला. मंगळवारी रात्री तालिबानने दावा केला की, त्यांनी चमन सीमेवर पाकिस्तानी सैन्याने केलेला हल्ला परतवून लावला. यानंतर तालिबाननेही प्रत्युत्तर दिले, ज्यात अनेक पाकिस्तानी सैनिक मारले गेल्याची माहिती आहे. तालिबानने पाकिस्तानी सैन्याचे काही रणगाडेही ताब्यात घेतले. चमन सीमेवर रात्री २ वाजता ६ ठिकाणी एकाचवेळी हल्ले झाले.