-६, ११ नोव्हेंबरला मतदान, १४ ला निकाल
- २४३ जागांसाठी कस लागणार
पाटणा : वृत्तसंस्था
बिहार विधानसभा निवडणुकीचा बिगूल अखेर वाजला. केंद्रीय निवडणूक आयोगाचे मुख्य निवडणूक आयुक्त ज्ञानेश कुमार यांनी सोमवार दि. ६ ऑक्टोबर रोजी निवडणूक कार्यक्रम जाहीर केला. बिहारमध्ये ६ आणि ९ नोव्हेंबर असे दोन टप्प्यांत मतदान होणार असून, १४ नोव्हेंबर रोजी निकाल जाहीर होणार आहे. सत्ताधारी आणि विरोधकांनी आधीपासूनच निवडणुकीची तयारी सुरू केली होती. त्यातच आज निवडणूक कार्यक्रम जाहीर झाल्याने आता राजकीय हालचालींना वेग येणार आहे.
बिहार विधानसभेच्या २४३ जागांसाठी ही निवडणूक होत आहे. पहिल्या टप्प्यासाठी १० ऑक्टोबरला अधिसूचना काढली जाणार आहे, तर दुस-या टप्प्यासाठी १३ ऑक्टोबरला अधिसूचना जारी केली जाईल. निवडणूक आयोगाने जाहीर केलेल्या कार्यक्रमाप्रमाणे पहिल्या टप्प्यासाठी ६ नोव्हेंबर रोजी मतदान पार पडणार आहे तर दुस-या टप्प्यासाठी ११ नोव्हेंबर रोजी मतदान होणार आहे. त्यानंतर १४ नोव्हेंबर रोजी निकाल घोषित केला जाणार आहे.
बिहार विधानसभेच्या पहिल्या टप्प्यात उमेदवारी अर्ज दाखल करण्यासाठी १७ ऑक्टोबर तर दुस-या टप्प्यासाठी २० ऑक्टोबरची तारीख देण्यात आली आहे. यासोबतच अर्ज पडताळणीची तारीख पहिल्या टप्प्यासाठी १८ ऑक्टोबर, दुस-या टप्प्यासाठी २१ ऑक्टोबर अशी आहे. उमेदवारी अर्ज मागे घेण्याची तारीख ही पहिल्या टप्प्यासाठी २० ऑक्टोबर, तर दुस-या टप्प्यासाठी २३ ऑक्टोबर असणार आहे. त्यानंतर पहिला टप्प्यातील मतदान ६ नोव्हेंबर, तर दुस-या टप्प्यातील मतदान ११ नोव्हेंबर रोजी पार पडणार आहे.
- मतमोजणी : १४ नोव्हेंबर.
