पंजाबचे राज्यपाल आणि चंडीगडचे प्रशासक बनवारीलाल पुरोहित यांनी ५ फेब्रुवारी २०२४ रोजी राष्ट्रपती द्रौपदी मुर्मू यांना राजीनामा सादर केला. वैयक्तिक कारणांसाठी व इतर काही जबाबदा-यांसाठी आपण राजीनामा देत असल्याचे त्यांनी पत्रात म्हटले आहे.
पुरोहित यांनी ४ फेब्रुवारी रोजी केंद्रीय गृहमंत्री अमित शहा यांची दिल्लीत भेट घेतली होती. यानंतर दुस-या दिवशी त्यांनी राजीनामा दिला. चंडीगडच्या महापौरपदाच्या निवडणुकीत भाजपने घवघवीत यश मिळवताना सर्व तिन्ही पदे जिंकली होती. यामुळे जोरदार धक्का बसलेल्या काँग्रेस-आप आघाडीने निवडणूक अधिका-यांवर मतपत्रिकांमध्ये फेरफार केल्याचा आरोप केला होता. यानंतर काही दिवसांनी पुरोहित-शहा यांची भेट झाली. पंजाबचे राज्यपाल व चंडीगडचे प्रशासक म्हणून नेमणूक होण्यापूर्वी पुरोहित यांनी २०१६ ते २०१७ या कालावधीत आसामचे तर २०१७-२०२१ या कालावधीत तामिळनाडूचे राज्यपाल म्हणून काम पाहिले.
