नवी दिल्ली : जागतिक कुस्ती संघटनेने भारतीय कुस्ती महासंघावर घातलेले निलंबन अखेर मंगळवार दि. १३ फेब्रुवारी २०२४ उठवले आहे. पण हे निलंबन उठवताना जागतिक कुस्ती महासंघाच्या प्रशासकीय समितीने सांगितले की, बजरंग पुनिया, विनेश फोगट आणि साक्षी मलिक या विरोधक त्रिकुटावर कोणतीही भेदभाव करणारी कारवाई होणार नाही. याबाबत भारतीय कुस्ती महासंघाने जर लेखी हमी दिली तरच त्यांच्यावरील निलंबन मागे घेण्यात येणार आहे. त्यामुळे आता भारतीय खेळाडू तिरंग्याखाली आंतरराष्ट्रीय स्पर्धेत खेळू शकतात.
भारतीय कुस्ती महासंघाने वेळेत निवडणूका न घेतल्यामुळे त्यांच्यावर निलंबन घालण्याचा निर्णय घेतला होता. त्यानंतर जागतिक कुस्ती संघटनेने अखेर ९ फेब्रुवारीला या सर्व गोष्टींचा आढावा घेतला आणि त्यासाठी एक बैठक घेतली आणि सर्व घटक आणि माहिती लक्षात घेऊन निलंबन मागे घेण्याचा निर्णय घेतल्याचे जागतिक संस्थेने म्हटले आहे. लैंगिक छळ आणि भ्रष्टाचाराच्या कथित कृत्यांसाठी तत्कालीन भारतीय कुस्ती महासंघाचे अध्यक्ष ब्रिजभूषण शरण सिंग यांच्याविरोधात कुस्तीपटूंनी आवाज उठवला होता. निषेधाच्या काही दिवसानंतर त्यांचे निलंबन करण्यात आले होते. त्यानंतर भारतीय कुस्ती महासंघाची निवडणूक घेण्यात आली. या निवडणूकीत भ्रष्टाचार झाल्याचा आरोप कुस्तीपटूंनी केला होता. त्यानंतर भारतीय कुस्ती संघटनेवर बंदी घातली होती.
