पॅरिस : भारताचा स्टार टेनिस खेळाडू रोहन बोपन्नाने सोमवार, दि. २९ जुलै रोजी निवृत्ती जाहीर केली. पॅरिस ऑलिम्पिकमध्ये अपयश आल्यानंतर बोपन्नाने हा निर्णय घेतला. भारताकडून टेनिसमध्ये रोहन बोपन्ना आणि एन श्रीराम बालाजी यांनी सहभाग घेतला होता. या दोघांच्या जोडीला पहिल्याच फेरीत पराभव स्वीकारावा लागला. रोहन बोपन्ना आणि एन श्रीराम बालाजी यांना ७-५, ६-२ असा पराभव स्वीकारावा लागला. रोहन बोपन्ना याने त्या सामन्यानंतर निवृत्ती जाहीर केली आहे. बोपन्नाने भारतासाठी जवळपास २२ वर्षे टेनिस खेळले.
रोहन बोपन्नाने निवृत्ती जाहीर करताना माझ्या टेनिस करिअरची अखेरची स्पर्धा होती. एक खेळाडू म्हणून मी कुठे पोहोचलो आहे, हे मला माहिती आहे. भारताचे प्रतिनिधीत्व २० वर्षांपेक्षा अधिक काळ करेन, असे वाटले नव्हते. २००२ मध्ये पदार्पण आणि २२ वर्षानंतर ऑलिम्पिकमध्ये देशाचे प्रतिनिधित्व केल्यानंतर निवृत्ती घेत आहे. मला या ऐतिहासिक कारकिर्दीवर गर्व आहे, असे रोहन बोपन्ना म्हणाले.
२०१६ च्या रियो ऑलिम्पिकमध्ये रोहन बोपन्ना आणि सानिया मिर्जा यांनी मिश्र दुहेरीच्या उपांत्य फेरीत धडक दिली होती. मात्र, त्यांना पदक जिंकता आले नव्हते. यावेळी एन. श्रीराम बालाजी याच्यासोबत पदक जिंकण्याची संधी होती. मात्र, फ्रान्सच्या गेल मोनफिल्स आणि रॉजर वेसेलिन यांच्या जोडीने त्यांना पराभूत केले.
रोहन बोपन्नाने त्यांच्या ऐतिहासिक टेनिस करिअरमध्ये ६ वेळा दुहेरी स्पर्धेत ग्रँड स्लॅमच्या अंतिम फेरीत प्रवेश केला. त्यापैकी २ वेळा ग्रँड स्लॅमचे विजेतेपद मिळाले. २०१७ मध्ये कॅनडाच्या गेब्रियला डैब्रोवस्की यांच्यासोबत मिश्र दुहेरीचे फ्रेंच ओपनचे विजेतेपद बोपन्ना यांनी मिळवले. २०२४ मध्ये ऑस्ट्रेलियाच्या मॅथ्यू एब्डन सोबत ऑस्ट्रेलियन ओपन स्पर्धादेखील त्यांनी जिंकली होती.
