पुणे : प्रतिनिधी
राज्यात डेंग्यू आणि झिकाची रुग्णसंख्या मोठ्या प्रमाणात वाढली आहे. याचवेळी देशात डेंग्यू आणि झिकावरील लस विकसित करण्याच्या दिशेने पावले टाकली जात आहेत. या दोन्ही रोगांवरील लस विकसित करण्यात आली असून, त्यांच्या दुस-या आणि तिस-या टप्प्यातील वैद्यकीय चाचण्या सुरू करण्यास मंगळवार, दि. १३ ऑगस्ट २०२४ रोजी मंजुरी देण्यात आली आहे. त्यामुळे भविष्यात या लशी उपलब्ध होण्याची आशा निर्माण झाली आहे.
देशात सध्या डेंग्यूच्या लशीवर ४ संस्थांकडून संशोधन सुरू आहे. सरकारने राष्ट्रीय जैववैद्यक धोरणांतर्गत डेंग्यू लसीच्या चाचण्यास परवानगी दिली आहे. डेंगीऑल असे या लसीचे नाव असून, तिच्या चाचण्या ५ वर्षांसाठी घेतल्या जाणार आहेत. या लसीची पहिली व दुसरी चाचणी पूर्ण झाली असून, तिस-या टप्प्यातील चाचणीसाठी भारतीय औषधे महानियंत्रकांनी परवानगी दिली आहे.
एनआयएचकडून तंत्रज्ञान हस्तांतरण अमेरिकेतील नॅशनल इन्स्टिट्यूट ऑफ हेल्थने (एनआयएच) डेंग्यूवरील लस विकसित केली आहे. या लशीचे तंत्रज्ञान जगभरातील अनेक कंपन्यांना हस्तांतरित करण्यात आले आहे. त्यातून पॅनासिआ बायोटेक ही लस भारतासाठी विकसित करीत आहे.
भारत बायोटेककडून
झिकाच्या लसीचे संशोधन
भारत बायोटेककडून झिकावरील लसीचे संशोधन सुरू आहे. कंपनीने लस विकसित केली असून, झिकाच्या निष्क्रिय विषाणूचा वापर या लशीत करण्यात आला आहे. या लशीची पहिल्या टप्प्यातील वैद्यकीय चाचणी पूर्ण झाली आहे.
