केंद्रीय कर्मचारी होणार मालामाल, २०२६ पासून लागू होणार आयोग
नवी दिल्ली : वृत्तसंस्था
केंद्रीय मंत्रिमंडळाने गुरुवार, दि. १६ जानेवारी २०२५ रोजी ८ व्या वेतन आयोगाला मंजुरी दिली. केंद्रीय कर्मचारी आणि पेन्शनधारक ८ व्या वेतन आयोगाची अनेक दिवसांपासून वाट पाहत होते. आता केंद्र सरकार लवकरच एक समिती स्थापन करून ८ वा वेतन आयोग तयार करण्याची प्रक्रिया सुरू करणार आहे, अशी घोषणा केंद्रीय रेल्वेमंत्री अश्विनी वैष्णव यांनी केली. ८ वा वेतन आयोग २०२६ पासून लागू होणार आहे. त्यामुळे पुढील वर्षी केंद्रीय कर्मचा-यांच्या वेतनात घसघशीत वाढ होणार आहे. वेतन आयोगाच्या शिफारशींचा लाभ ५० लाख केंद्रीय कर्मचारी आणि ६५ लाख निवृत्तीवेतनधारकांना होणार आहे. ७ वा वेतन आयोग लागू करण्यासाठी १ लाख कोटी रुपये लागले होते. आता आठव्या आयोगासाठी आणखी मोठा खर्च येणार आहे.
पंतप्रधान नरेंद्र मोदी यांच्या निवासस्थानी गुरुवार, दि. १६ जानेवारी रोजी केंद्रीय मंत्रिमंडळाची बैठक झाली. या बैठकीत ८ व्या वेतन आयोगाला मंजुरी देण्यात आली. या आधी केंद्रीय कर्मचा-यांच्या संघटनांनी कॅबिनेट सचिवांची भेट घेऊन ८ वा वेतन आयोग स्थापन करण्याची मागणी केली होती. आतापर्यंत कर्मचा-यांना सातव्या वेतन आयोगाअंतर्गत पगार मिळत होता. आता ८ वा वेतन आयोग लागू झाल्यास कर्मचा-यांच्या वेतनात मोठी वाढ होणार आहे.
२०१६ मध्ये ७ वा वेतन आयोग
१ जानेवारी २०१६ पासून देशात ७ वा वेतन आयोग लागू करण्यात आला आहे. दर १० वर्षांनी नवीन वेतन आयोग लागू होतो. त्यामुळे आता केंद्रीय कर्मचा-यांना २०२६ पासून आठवा वेतन आयोग लागू होणार आहे. लवकरच अध्यक्ष आणि २ सदस्यांची नियुक्ती केली जाईल. सरकारने नियुक्त केलेला हा आयोग सर्व राज्यांशी चर्चा करेल. तसेच कर्मचा-यांशी चर्चा आणि सूचना विचारात घेईल आणि केंद्राकडे आवश्यक त्या शिफारशी करेल. त्यानंतर केंद्र सरकार त्यावर निर्णय घेईल.
२०१४ मध्ये ७ व्या
वेतन आयोगाची स्थापना
२८ फेब्रुवारी २०१४ रोजी सातव्या वेतन आयोगाची स्थापना करण्यात आली होती. दीड वर्षांनंतर नोव्हेंबर २०१५ मध्ये आयोगाने केंद्र सरकारला शिफारशी सादर केल्या. त्यानंतर २०१६ मध्ये ७ वा वेतन आयोग लागू करण्यात आला होता. आता ८ वा वेतन आयोग २०२६ मध्ये लागू होईल, असे सांगण्यात आले.
वेतन वाढीसाठी
फिटमेंट फॅक्टर
वेतन आयोगातील वाढ ठरविण्यात फिटमेंट फॅक्टर महत्त्वाचा असतो. त्या आधारे सरकारी कर्मचा-यांचे पगार ठरवले जातात. सातव्या वेतन आयोगानुसार हा फिटमेंट फॅक्टर २.५७ टक्के इतका होता. आठव्या वेतन आयोगानुसार हा फिटमेंट फॅक्टर २.८६ ते ३ टक्क्यांपर्यंत वाढण्याची शक्यता आहे. त्यामुळे कर्मचा-यांच्या वेतनात मोठी वाढ होऊ शकते.
