अंजली दमानियांचा आरोप, मुंडेंच्या राजीनाम्याची मागणी
मुंबई : सरपंच संतोष देशमुख हत्या प्रकरणानंतर आरोप आणि टीकेचा चक्रव्यूहात अडकलेल्या धनंजय मुंडे यांच्यावर मंगळवारी सामाजिक कार्यकर्त्या अंजली दमानिया यांनी भ्रष्टाचाराचे गंभीर आरोप केले असून धनंजय मुंडे कृषिमंत्री असताना बाजारभावापेक्षा अधिक दराने ५ वस्तूंची खरेदी करण्यात आली. यात पावणेतीनशे कोटींचा घोटाळा झाल्याचा आरोप करताना आता तरी त्यांची मंत्रिमंडळातून हकालपट्टी करावी, अशी मागणी त्यांनी केली. यावर ही खरेदी मुख्यमंत्र्यांच्या परवानगीनेच डीबीटीऐवजी थेट केली. त्यामुळे आपण दमानियांविरोधात अब्रुनुकसानीचा दावा ठोकू, असा इशारा दिला आहे.
बीड जिल्ह्यातील मस्साजोगचे सरपंच संतोष देशमुख हत्या प्रकरणात वाल्मीक कराड यांचा कथित सहभाग, त्यांना राजाश्रय दिल्याचा आरोप यामुळे धनंजय मुंडे आधीच अडचणीत आहेत. त्यातच कृषिखात्याचे मंत्री असताना त्यांच्या कार्यकाळात ५ वस्तूंच्या खरेदीत मोठ्या प्रमाणात भ्रष्टाचार झाल्याचा आरोप आज अंजली दमानिया यांनी पत्रकार परिषदेत केला. धनंजय मुंडे कृषिमंत्री असताना काही वस्तू शेतक-यांना देण्यात येणा-या थेट अनुदानाच्या यादीतून वगळल्या. नॅनो युरिया, नॅनो डीएपी, बॅट्री स्पेअर, मेटाल्डे हाईट आणि कापूस बॅगा यांच्या खरेदीत या काळात मोठा घोटाळा झाल्याचा आरोप अंजली दमानिया यांनी केला.
नॅनो युरिया आणि नॅनो डीएपीची निर्मिती इस्को नावाची कंपनी करते. नॅनो युरियाची ५०० मिलीमीटरची बाटली खुल्या बाजारात ९२ रुपयांना मिळते. पण धनंजय मुंडे यांच्या काळात हीच बॉटल २२० रुपयांना खरेदी करण्याचे टेंडर काढण्यात आले. त्यावेळी कृषी खात्याने जवळपास २० लाख बाटल्या खरेदी केल्या. नॅनो डीएपची २६९ रुपये किमतीची बाटली ५९० रुपये दराने खरेदी करण्यात आली. तर बॅटरी स्प्रेअरचा बाजारभाव २४९६ रुपये असताना कृषी खात्याने एक स्प्रेअर ३४२५ रुपयांना विकत घेतला.
गोगलगायीचा प्रादूर्भाव झाल्याने कापूस आणि सोयीबीनचे नुकसान होते. मेटाल्डे हाइड हे पीआयए कंपनीचे पेटेंटेड उत्पादन आहे. हे उत्पादन बल्कमध्ये घेतल्यावर स्वस्त मिळते. रिटेलमध्ये आता या उत्पादनाचे दर ८१७ रुपयाला आहे. पण कृषी मंत्री मुंडेंनी १२७५ रुपयाला विकत घेतले. ६ लाख १८ हजार कॉटन स्टोरेज बॅग घेतल्या. काही दिवसापूर्वी आयसीएआय नावाची संघटना आहे. त्यांनी ५७७ रुपयाला बॅगा घेतल्या. पण मुंडेंच्या कृषी खात्याने टेंडरच्या माध्यमातून १२५० रुपयाला याच बॅगा घेतल्या व ३४२ कोटीच्या टेंडरमध्ये १६० कोटी रुपये जास्त दिले गेले. या माध्यमातून प्रचंड मोठा आर्थिक घोटाळा करण्यात आल्याचा दावा अंजली दमानिया यांनी केला. मी दिलेले दर खुल्या बाजारातील किरकोळ विक्रीचे आहेत. या वस्तू मोठ्या प्रमाणात खरेदी करताना घाऊक दराने म्हणजे आणखी कमी किमतीत मिळायला हव्या होत्या. याचाच अर्थ जवळपास ७० टक्के वाढीव किंमत देऊन मोठ्या प्रमाणात घोटाळा करण्यात आल्याचा आरोप दमानिया यांनी केला.
नॅनो युरिया, डीएपीसह
५ वस्तू खरेदीत भ्रष्टाचार
नॅनो युरिआ, नॅनो डीएपीसह ५ वस्तू खरेदीत धनंजय मुंडेंनी भ्रष्टाचार केला. नॅनो युरियाची ५०० मिलीमीटरची बाटली ९२ रुपयांना मिळते. ती बॉटल २२० रुपयांना खरेदी करण्याचे टेंडर काढले. त्यावेळी कृषिखात्याने १९ लाख ६८ हजार ४०८ बाटल्या खरेदी केल्या. नॅनो डीएपीची २६९ रुपयांची एक बाटली ५९० रुपयांना खरेदी केली तर बॅटरी स्प्रेअरचा बाजारभाव २४९६ रुपये असताना कृषिखात्याने एक स्प्रेअर ३४२५ रुपयांना विकत घेतले. या माध्यमातून प्रचंड मोठा आर्थिक घोटाळा केल्याचा आरोप अंजली दमानिया यांनी केला.
