चंद्रशेखर बावनकुळे अध्यक्ष, भुजबळांचाही समावेश
मुंबई : प्रतिनिधी
मराठा आरक्षणासाठी मोठा निर्णय घेतल्यानंतर राज्य सरकारने आता ओबीसींसाठी महत्त्वाचे पाऊल उचलले आहे. ओबीसींच्या विकासासाठी स्वतंत्र मंत्रिमंडळ उपसमिती गठीत करण्यात आली असून चंद्रशेखर बावनकुळे या उपसमितीचे अध्यक्ष असतील, अशी माहिती बुधवार, दि. ३ सप्टेंबर २०२५ रोजी सूत्रांनी दिली. या उपसमितीत छगन भुजबळ, पंकजा मुंडे यांच्यासह एकूण ८ मंत्री असणार आहेत.
मराठा आरक्षणासंबंधी राज्य सरकारने हैदराबाद गॅझेट लागू करण्याचा निर्णय घेतला. त्याविरोधात ओबीसी नेत्यांनी आवाज उठवला. त्यानंतर आता ओबीसींसाठीही उपसमितीच्या माध्यमातून विकासात्मक निर्णय घेण्याच्या हालचाली सुरू झाल्या आहेत. ओबीसींच्या विकासासाठी ही उपसमिती गठीत करण्यात येणार असून त्यांच्या सामाजिक, शैक्षणिक आणि आर्थिक स्थितीबाबत कार्यक्रम आखले जाणार आहेत. तसेच ओबीसांच्या योजनांबाबत ही समिती कामकाज पाहणार आहे.
समितीत या सदस्यांचा समावेश
या समितीचे अध्यक्षपद हे भाजपचे मंत्री चंद्रशेखर बावनकुळे यांच्याकडे असणार आहे तर या समितीत भाजपचे चार, राष्ट्रवादीचे दोन आणि शिवसेनेचे दोन मंत्री असणार आहेत. यामध्ये छगन भुजबळ, गणेश नाईक, गुलाबराव पाटील, संजय राठोड, पंकजा मुंडे, अतुल सावे, दत्तात्रय भरणे सदस्य असणार आहेत.
